Ji bo guherînê ber bi agahîya çalakbar ve: dîyaloga bi Bakur û Rojhilata Sûriyeyê re

Ew proje ji alîyê sazîya fînî Emmaus Jokioinen ve tê birêvebirin. Hevkarên me yên li Bakur û Rojhilata Sûriyeyê, Enstîtuya Zanist û Teknolojiya Nûjen a Zanîngeha Rojava û Akademiya Polîteknîka Tigris in. Herwiha têkilî bi saziyên herêmê re, dezgehên Rêveberîya Xweser a Bakur û Rojhilata Sûriyeyê, berpirsiyarên binesaziya enerjî û çandiniyê, û sazîya hawirparêz Keziyên Kesk re jî hene. Di planê de, hevkarîya aktorên perwerdehîyê yên Herêma Kurdistanê ya Iraqê jî heye. Proje ji bo sala 2025an, piştgirîya Maj and Tor Nessling Foundation standiye.

Zanîngeha Rojava di zanîstên mirovî û civakî de xwedî têkilîyên xurt ên navnetewî ye. Lê belê, di qada zanîstên xwezayî û endezyarîyê de, pêdivî bi pisporên nû hene ku dixwazin bi beşdarbûna di pêşxistina pisporiya herêmî di hînkirin û lêkolînê de piştgiriyê bidin hewldanên xweserî û domdariyê li Bakur û Rojhilatê Sûriyê. Em li nirxandinvanên dilxwaz ji bo artîkelên lêkolînê, û serperiştkarên ji dûr ve (online) yên tezên master û doktorayê, ji bo Enstîtuya Zanistên Xwezayî û Teknolojiya Modern li Zanîngeha Rojava digerin.

Akademiya Polîteknîk a Tigris saziyeke perwerdehî ya nû ye ku bernameyên xwendinê di endezyariya elektrîk û mekanîkî, bernamesazî û telekomunîkasyonê de pêşkêş dike. Armanca polîteknîkê ew e ku bi hevkariyek nêzîk bi kardêrên di sektora teknolojiyê de, jêhatîyên teknîkî yên sepandî yên herêmî pêş bixe. Hem jîngeha xwendinê li Qamîşlo û hem jî rêbazên hînkirinê ji bo teşwîqkirina afirînerî û înîsiyatîfê hatine avakirin. Bi alîkariya Emmaus Jokioinen, polîteknîk hewl dide ku bi pisporên pedagojiyê û mamosteyên endezyariyê yên Ewropî re têkiliyan deynê.

Rêveberiya Xweser hewl dide ku çandiniya hawirparêz û ji nû ve avakirina ekolojîk a binesaziya enerjiyê ya ku di bombebaranên Tirkiyê de têk çûne, pêş bixe. Ji bo vê ne tenê pêşxistina demdirêj a zanîna herêmî pêwîste, lê di heman demê de pêdivî bi alîkariya pisporî a lezgîn di dîtin û bicîhanîna çareseriyên pratîkî yên bilez lê domdar heye. Bi rêya vê projeyê, Desteya Aborî û Çandiniyê ya rêveberiya xweser dixwaze ku fikir û agahiyan bi pisporên biyanî re parve bike.

Armanca Keziyên Kesk ew e ku bi sazîyên hawirparêz re têkilîyên navneteweyî ava bike û ji bo berhevkirin û sazkirina lêkolînên li ser xwezaya Bakur û Rojhilata Sûriyeyê alîkarîyê bi dest bixe. Her wiha, ew dixwazin ji bo bilindkirina hişmendîya hawirparêz, di komên cuda yên herêmî de derfetê bibînin û ramanên xwe parve bikin.

Emmaus Jokioinen

Emmaus Jokioinen sazîyeke civakî ye û ji sala 1977an ve ji bo jiyana cihêreng, azad û domdar dixebite. Di nav şer û felaketên jîngehî de, çareserîyên ku alîkarîya yekîtî û cihêrengîya jiyan, xweza û civakê dikin ji her demê girîngtir in. Armanca Emmaus Jokioinen piştgirîya kom û civakên ku wekhevîya mirovahîyê û jiyana domdar bi pêş dixin e û ji bo lêgerîna mezinbûna aborî, afirandina alternatîf ên radîkal e. Armanca me beşdarbûna hewldanên avakirina dinyayekê ye ku ew ji kedxwarîyê dûr e û ji bo her kesî jiyanekê pêşkêş dike.

Bersivên bidestxistina civaka domdar, azad û wekhev bêhempa ne û divê ji derveyî Bakurê cihanî were dîtin: ji konfederalîstên demokratîk ên Rojhilata Navîn, Zapatîstayên Amerîkaya Latînî û Adîvasîyên nîvparzemîna hîndî. Amûrên çalakîyên Emmaus Jokioinen ji alîyê hevkarên herêmî ve tên diyarkirin. Armanca me ne tenê piştgirîyê ye lê hînbûnê ye jî.